موقع سبورت 360- أعلن باسم مرسي لاعب الزمالك فسخ تعاقده مع نادي سموحة.
و غرد باسم مرسي عبر حسابه بموقع التواصل الاجتماعي”تويتر”:تلقيت اليوم اتصال من مسئول ف نادى الزمالك يطالبنى بالرجوع ، قالى بالنص ” عندى ليك مفاجأة ، الزمالك عايزك ترجع و تروح نادى تانى بدل سموحة ” ” احنا الاخرنا البطاقة الدولية عشان لو كنت لعبت الماتش مكناش هنعرف نرجعك ”
وتابع باسم بسبب موضوع معين بقيت انا طرف فيه بدون ارادتى ، دلوقتى قدامى اختيار من اتنين الاول انى العب في الزمالك و المدرب مش عايزنى بالف جنيه في ست شهور.
واضاف: الاختيار التانى انى انتقل لفريق ترتيبه الاخير ف الدورى . هل انا بعد ما لعبت اربع مواسم ف الزمالك ، حصلنا فيهم على ٥ بطولات و احرزت ٥٣ جول ، دة يكون مصيرى من مسئولين نادى الزمالك ؟!
وواصل لاعب الزمالك تغريداته: قبل كدة انا مكنتش بطلع اتكلم ، بس الموضوع يوصل ان يتقال ان التاخير بسببى فى موضوع البطاقة الدولية و تشويه سمعتى ان دة بسبب خلاف مادى بينى و بين النادى اليونانى ف دة مش صحيح.
و غرد باسم: انا عقدى اتفسخ رسمى من الاتحاد اليونانى ، لو مكنش اتفسخ رسمى مكنش يحق لى انى اتمرن مع نادى سموحة.
وأضاف: انا فى وقت اقامتى كاملة في اليونان ، حصلت على ٥ الاف يورو فقط و اتنازلت عن جميع مستحقاتى للزمالك و جددت سنتين اتنازلت فيهم عن ٤ مليون جنيه عشان يوافقوا على احترافى، و عند انتقالى اعارة لسموحة جددت سنة كمان على بياض .
و واصل باسم: انا هرجع نادى الزمالك مش لو بالف جنيه لو ببلاش لان شرف ليا انى العب في نادى الزمالك .
مكنتش حابب انى اتكلم رغم اتصال عدة برامج بيا من وقت وصولى للقاهرة لتوضيح عدة امور بمقابل مادى بس انا كنت برفض .
و تابع: انا حالياً بعد ما استقريت فى الاسكندرية و نقلت اسرتى و اغراضى و استأجرت محل سكن ، تم ابلاغى انى لازم الغى كل دة و ارجع حالاً يا اقعد ست شهور في البيت.
و اختتم باسم مرسي تغريداته: يارب الناس الكانت بتتهمنى انى مقصر طول الوقت و بعمل مشاكل تكون الصورة واضحة لهم ، انا طول الوقت بتحط ف مشاكل انا مش سبب فيها . اسف على التطويل بس كان لازم التوضيح.
